MANIFESTO POLA UNIDADE

O DÍA DA NACIÓN GALEGA, O DÍA DE TOD@S

O 25 de Xullo, historicamente o Día da Patria Galega, oficialmente “Día Nacional de Galicia”, é o día no que as cidadás e cidadáns galegos celebramos a nosa nación. Vivimos un tempo excepcional, os problemas económicos e sociais do noso país, na vez de mellorar, agrávanse. Afrontamos unha recentralización que nos prexudica, dificulta a supervivencia de empresas e traballo e pretende liquidar sectores produtivos enteiros, ao tempo que conduce á desaparición da nosa lingua e cultura.

Lembremos a nosa historia recente, lembremos como todo o país soubo facer fronte a unha catástrofe provocada por un Goberno que se desentendía dela. Naquela altura a sociedade galega demostrou disposición e capacidade para organizarse e afrontar o desafío. Demostrou ser unha nación capaz de existir por ela mesma.

Así é como somos nós e así defendemos o noso país. Mais este é tamén un momento no que as galegas e galegos debemos mostrar vontade común no tocante ao noso futuro.

Galicia precisa existir con forza para defender os intereses inmediatos e estratéxicos como nación.  Sabemos da inmensa forza da unidade, do enorme potencial de ilusión e entusiasmo colectivo que poden xerar a defensa da nación e da soberanía. Estamos na hora de andar ese camiño.

Este é un chamado que nace da cidadanía que, sen agardar instrucións nin consignas, quere manifestar o seu desexo e a súa vontade de nos reunir nunha celebración que diga claramente que as divisións nos debilitan e nos encamiñan á insignificancia, mentres a unión multiplica as nosas forzas para procurarmos as ferramentas necesarias que nos permitan decidir que queremos ser, que nos posibiliten a construción dun futuro de luz que non hipoteque o mañá de fillos e fillas.

Un chamado aos cidadáns e cidadás, aos colectivos sociais, culturais, recreativos..., a que se sumen, sen exclusión previa ningunha, a un Día da Nación Galega, un día de unidade que queremos apoiado polos partidos e organizacións políticas.

As persoas que subscribimos este chamado pedímoslle ás forzas políticas que nos convoquen co exemplo da unidade cívica, renunciando a patrimonializar ninguén este acto de vital importancia na nosa historia.

Cada un dos e das asinantes, facémolo de xeito persoal porque é a forma máis nidia de expresión da cidadanía: a suma das vontades individuais. E coas nosas sinaturas queremos manifestar o desexo de marcharmos tod@s polas rúas de Compostela detrás dunha faixa que, levando escrito o nome da nación e portada por xente do común, represente aos homes e mulleres que son os lexítimos donos da galeguidade: a maioría do pobo galego, a cidadanía do país.

Ese día, máis que nunca, queremos ser un país en marcha que tome nas súas mans a construción dunha nación para tod@s.

-> Descarga o logo 25-X A NACIÓN GALEGA: en PDF (637KB) ou coma imaxe JPG (408KB). Tamén en baixa resolución, para os perfís de twitter: imaxe JPG (49KB).